Friday, 22 June, 2018
مقدور ہو تو ساتھ رکھوں نوحہ گر کو میں

مقدور ہو تو ساتھ رکھوں نوحہ گر کو میں
مقتدا منصور کا کالم

 

وطن عزیز میں انتخابات کا موسم ہے۔ ابھی سینیٹ کے انتخابات سے فارغ ہوئے ہیں کہ عام انتخابات سر پر منڈلا رہے ہیں۔ یہ کھیل اگست تک چلنے کا امکان ہے۔ بشرطیکہ حالات سازگار اور معمولات اسی طرح چلتے رہے۔ عدالتیں فعال ہیں اور ذرایع ابلاغ بھی توانا۔ جب کہ عوام کنفیوزڈ۔کیونکہ مقدمات کی سماعت میں تیزی تو ضرور آرہی ہے، مگر صرف یک طرفہ۔ حالانکہ کرپشن کا آسیب زندگی کے ہر شعبہ پر حاوی ہے۔

متوشش شہری جو نہ اِدھر والوں کے حامی ہیں اور نہ اُدھر والوں کے ثناخواں، شدید ذہنی الجھنوں میں مبتلا ہیں۔ اگر کہیں کہ احتساب درست سمت میں جاری ہے، تو جمہوریت دشمنی کا الزام لگتا ہے۔ اگر کہیں کہ Judicial Activism ہورہا ہے، تو توہین عدالت کے مرتکب ٹھہرتے ہیں۔ سوال یہ ہے کہ جائیں تو جائیں کہاں؟ سینیٹ کے انتخابات میں جو کچھ ہوا اور چیئرمین و وائس چیئرمین کی نشستوں کے لیے جو کچھ ہورہا ہے، وہ دیکھتے ہوئے پورا ملک انگشت بدنداں ہے۔

جو بات میاں صاحب کررہے ہیں، اس میں سچائی ضرور ہے، مگر آدھی۔ اس میں شک نہیں کہ ان کے خلاف آنے والا فیصلہ عدل کے معیار پر پورا نہیں اترا، یعنی مقدمہ پاناما کا، نکالا گیا اقامہ پر۔ ان پر جو چھری چلی، وہ آرٹیکل 62 اور 63 کی تھی۔ مگر جناب سابقہ دور حکومت میں جب 18 ویں آئینی ترمیم پر کام ہورہا تھا، تب ان شقوں کو خارج کرنے کی بات کی گئی تھی۔ تو میاں صاحب ہی ان شقوں کی حمایت میں سینہ تان کر کھڑے ہوگئے تھے۔بقول کبیر بھگت کہ: اب رووے کیا ہوت، جب چڑیاں چگ گئیں کھیت۔

میاں صاحب کا دوسرا گلہ یہ ہے کہ ہزاروں ووٹوں سے منتخب فرد کو چند جج نکال باہر کرتے ہیں۔ شاید میاں صاحب بھول گئے کہ عدلیہ چند ججوں پر ہی مشتمل ہوتی ہے۔ ہزاروں ووٹ لینا اور بے اعتدالیوں کی جوابدہی دو الگ معاملے ہیں۔ اگر ان کے کلیے کو تسلیم کرلیا جائے تو ہر کامیاب رکن اسمبلی جو چاہے کرتا پھرے اس سے پوچھ تاچھ کا سلسلہ بند کردینا چاہیے۔ پڑوس میں ایک وزیراعظم نرسمہا راؤ نام کے ہوا کرتے تھے، ان پر وزارت عظمیٰ کے دوران بدعنوانی کے الزامات لگے۔ عدالت بیٹھی، جس نے انھیں کرپشن کے جرم کا مرتکب قرار دیا۔

یہ بنچ بھی تین یا چار ججوں پر مشتمل تھا، مگر انھوں نے کبھی نہیں کہا کہ میں لاکھوں ووٹ لے کر آیا، کروڑوں کا وزیراعظم ہوں، مجھ پر تین ججوں کا ٹولہ کیوں مقدمہ چلارہا ہے۔ ان کے خلاف فیصلہ بعد از مرگ آیا۔ پڑوسی ملک ہی کی بات کریں تو وہاں روز اول سے کوشش کی گئی کہ دو ادارے ہر قسم کی تنقید سے محفوظ رہیں، یعنی عدلیہ اور الیکشن کمیشن۔ مگر ہمارے یہاں یہی دو ادارے سب سے زیادہ انگشت نمائی کا شکار ہیں۔کیونکہ دونوں ہی اپنی حیثیت کو غیر جانبدار اور غیر متنازع رکھنے میں مسلسل ناکام ہیں۔

میاں صاحب کو تین مرتبہ موقع ملا۔ دو مرتبہ بھاری اکثریت کے ساتھ۔ مگر انھوں نے یہ مواقع ضایع کر دیے۔ اگر اس وقت آپ آئین میں عوام دوست ترامیم کرتے، نظام عدل کو درست کرتے، انتظامیہ اور قانون نافذ کرنے والوں کی تطہیر کرتے تو شاید یہ دن نہ دیکھنا پڑتے۔ مگر میاں صاحب طاقت کے استعمال پر یقین رکھتے ہیں۔ اپنے دوسرے دور اقتدار میں بھی وہ عدلیہ پر چڑھ دوڑے تھے۔ میاں صاحب ہوں یا ان کے رقیب کپتان صاحب۔ دونوں ہی جمہوریت کا واویلا تو بہت کرتے ہیں، مگر پارلیمان میں جاکر وہاں بحث کا حصہ بننے کے لیے دونوں میں سے کسی کو بھی فرصت نہیں ہے۔

آج عدلیہ کیونکر تنقید کا نشانہ ہے؟ اس پہلو پر نہ قانون کے رکھوالے غور کر رہے ہیں اور نہ متوشش شہری اور نہ ہی سیاسی اکابرین۔ جسٹس منیر مرحوم نے نظریہ ضرورت یعنی Principle of necessity کا جو کلیہ اس وقت کے گورنر جنرل ملک غلام محمد کے احکامات کو جلا بخشنے کے لیے متعارف کرایا تھا، ان کے بعد آنے والے ادوار میں اسی کند چھری سے جمہوریت کا گلا کاٹا گیا۔ یہ عمل ان سے ہوتا ہوا جسٹس افتخار محمد چوہدری تک پہنچا۔ جن کی بحالی کے لیے میدان عمل میں متحرک ہر اول دستہ کے سالار اعلیٰ پیپلز پارٹی کے بیرسٹر اعتزاز احسن تھے۔ دوسری صف میں محمد نواز شریف اور کپتان عمران خان تھے۔ مگر بعد میں معلوم ہوا کہ کٹھ پتلی کے اس کھیل کی ڈوریں تو کوئی اور ہلا رہا تھا۔

چوہدری صاحب ہر چینل پر دعویٰ کیا کرتے کہ ان کی جدوجہد نظام عدل میں اصلاحات لانے کے لیے ہیں۔ وہ جھوم جھوم کر یہ نظم پڑھتے کہ ’’ریاست ہوتی ہے ماں کے جیسی‘‘۔ مگر نہ عدلیہ میں اصلاحات آئیں، نہ عام آدمی کو کوئی ریلیف ملا اور نہ ہی ریاست نے زدپذیر جنتا کو اپنی آغوش میں سمیٹا۔ البتہ جسٹس افتخار محمد چوہدری اور ان کی ٹیم بحال ضرور ہوگئی۔ اس کے بعد کیا ہوا، سب نے دیکھا۔

جسٹس چوہدری نے عوام الناس کے مقدمات ایک طرف ڈالتے ہوئے سیاسی مقدمات کو اپنی ترجیحات بنایا اور اپنے ریمارکس کے ذریعہ عوام کے قلب و ذہن کو گرمانے کا نیا کلیہ ایجاد کردیا۔ انھوں نے اس دھڑلے کے ساتھ ازخود نوٹس لیے کہ لفظ نوٹس کو اپنے آپ سے شرم آنے گی۔ ان کے بعد آنے والے اس روایت پر آج تک کاربند ہیں۔ کہا جارہا ہے کہ عدالتوں پر 11 لاکھ مقدمات کا بوجھ ہے۔ جب سیاسی مقدمات سے فرصت ملے گی، تب کہیں ان کا نمبر آسکے گا۔

اگر ملک کی مجموعی صورتحال پر نظر ڈالیں تو دس (10) کلیدی مسائل سامنے آتے ہیں۔ جن میں بے روزگاری، خواندگی کی کمتر شرح، صحت کے وسیع تر ہوتے معاملات، شدت پسندی و جنون پرستی کا بڑھتا ہوا رجحان، توانائی کا بحران، سیاسی عدم استحکام، ناکام خارجہ پالیسی، آبادی کا بے ہنگم انداز میں بڑھتا ہوا دباؤ، تجارتی خسارہ اور ہر شعبہ حیات میں بدعنوانی۔ مگر ان تمام مسائل کی جڑ بری حکمرانی ہے، جس میں یہ ملک روز اول ہی سے مبتلا کردیا گیا۔ ستر برسوں کے دوران اس ملک کے عوام نے سیاسی اور غیر سیاسی دونوں طرح کے حکمرانوں کو آزمایا۔ مگر نہ کوئی مہاتیر محمد پیدا ہوا اور ہی جنرل ڈیگال جیسا وژنری۔

جب حکمران اشرافیہ کی آنکھوں پر خودغرضی، موقع پرستی اور خودنمائی کی دبیز چربی چڑھی ہو تو انھیں نہ اطراف سے منڈلاتے خطرات نظر آتے ہیں، نہ ملک کا انتشار کی دلدل میں پھنسا معاشرہ نظر آتا ہے۔ نہ درسگاہوں اور شفاخانوں کی حالت زار پر نظر جاتی ہے اور نہ بدعنوانیاں اور کرپشن کا جن انھیں ستاتا ہے، کیونکہ یہ جن تو خود آسیب کی مانند ان کے سروں پہ مسلط ہے۔ یہ کہا جائے تو غلط نہ ہوگا کہ ملک میں ایسا کوئی بھی شعبہ نہیں، جو درست انداز اور درست سمت میں کام کررہا ہو۔ حد یہ ہے کہ نئے اداروں کی تعمیروتشکیل تو درکنار، برطانوی دور سے ورثے میں ملنے والے اداروں تک کو تباہ کرکے رکھ دیا ہے۔ وطن عزیز کا حال دیکھ کر غالب کا یہ شعر یاد آتا ہے کہ:

حیراں ہوں دل کو روؤں کہ پیٹوں جگر کو میں

مقدور ہوتوساتھ رکھوں نوحہ گر کو میں

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
بشکریہ ’’روزنامہ ایکسپریس‘‘
نوٹ: مبصر ڈاٹ کام ۔۔۔ کا کالم نگار، بلاگر یا مضمون نگار کی رائے سے متفق ہونا ضروری نہیں ۔۔۔ اگر آپ بھی ہمارے لیے کالم / مضمون یا اردو بلاگ لکھنا چاہتے ہیں تو قلم اٹھائیے اور 500 الفاظ پر مشتمل تحریر اپنی تصویر، مکمل نام، فون نمبر اور مختصر تعارف کے ساتھ info@mubassir.com پر ای میل کریں۔ ادارہ

اپنا تبصرہ دینے کے لیے نیچے فارم پر کریں
   
نام
ای میل
تبصرہ
  45202
کوڈ
 
   
متعلقہ کالم
کسی بھی کتاب پر تبصرے کا سہل نسخہ یہ ہے کہ آپ اس پر تبصرہ کرنے کے بعد کتاب پڑھنا شروع کریں۔ گذشتہ دنوں مجھے یہی محسوس ہوا جب برصغیر کے دو سابق جاسوسانِ عظام آئی ایس آئی کے سابق سربراہ ریٹائرڈ لیفٹننٹ جنرل اسد درانی
رحمتوں اور برکتوں کا مقدس مہینہ طلوع ہو چکا ہے۔ یہ وہی عظیم الشان مہینہ ہے جس میں قرآنِ حکیم نازل ہوا اَور برِصغیر کے مسلمانوں کا آزاد وطن پاکستان وجود میں آیا۔ اللہ تعالیٰ نے اس کی پیدائش کے لیے لیلۃ القدر مختص فرمائی اور
مجھے نہیں معلوم کہ سبب کیا ہے البتہ پچھلے چند برس میں ایک تبدیلی تو ضرور آئی ہے۔اب لوگ اپنے الفاظ واپس لینے لگے ہیں اور معذرت بھی کرنے لگے ہیں۔ درگذر کرنے والوں کی تعداد بھی پہلے سے زیادہ ہوگئی ہے۔
اس دنیا میں اگر کسی شے کا سب سے زیادہ ریپ ہوا ہے تو وہ دلیل ہے اور پھر اس ریپ زدہ دلیل کے ساتھ تہذیب کا جیسا ریپ ہوا اور ہو رہا ہے اس کا کوئی توڑ کم ازکم مجھے تو ٹپائی نہیں دے رہا ۔حل تو خیر لاینحل ہے۔

مزید خبریں
صوبہ بلوچستان کے ضلع تربت میں کالعدم تنظیموں سے تعلق رکھنے والے 15 اہم کمانڈروں سمیت تقریباً 200 فراری ہتھیار ڈال کر قومی دھارے میں شامل ہوگئے ہیں۔ تقریب کے مہمان خصوصی وزیراعلیٰ بلوچستان میرعبدالقدوس بزنجو تھے۔ اب تک ایک ہزار 8 سو کے قریب فراری ہتھیار ڈال کر قومی دھارے میں شامل ہوچکے ہیں۔
سابق وزیراعظم اور حکمران جماعت کے سربراہ میاں محمد نواز شریف کی کل سعودی عرب روانگی کا امکان ہے۔ جہاں وزیراعلیٰ پنجاب شہباز شریف پہلے سے موجود ہیں۔ جبکہ وفاقی وزیر ریلوے خواجہ سعد رفیق بھی پی آئی اے کی پرواز کے ذریعے اہلخانہ کے ہمراہ سعودی عرب روانہ ہوگئے ہیں
مسجد اقصیٰ کے امام وخطیب الشیخ اسماعیل نواھضہ نے برما میں مسلمانوں پر ڈھائے جانے والے مظالم کی شدید مذمت کی اور عالم اسلام پر زور دیا کہ وہ روہنگیا مسلمانوں کو ریاستی جبر وتشدد سے نجات دلانے کے لیے موثر اقدامات کریں
بھارت میں شدید گرمی کے باعث مرنے والوں کی تعداد 134ہوگئی بھارتی میڈیا کے مطابق شدید گرمی کے باعث بھارت کی ریاست تلنگانہ ،آندھرا پردیش اور اڑیسہ میں مرنے والوں کی تعداد 134 ہوگئی ہے۔

مقبول ترین
گڈانی میں سمندر میں نہاتے ہوئے ایک ہی خاندان کے 17 افراد ڈوب گئے، جن میں سے 4 خواتین کی لاشیں نکال لی گئیں۔ ریسکیو ذرائع کے مطابق ایک بچے کو بے ہوشی کی حالت میں جبکہ باقی 10 افراد کو صحیح سلامت ریسکیو کرلیا گیا۔
اب اس وقت بھی یہ فیچر استعمال کرسکتے ہیں۔ واضح رہے کہ بی ٹا ٹیسٹ کے لیے ایک نیا واٹس ایپ ورژن 2.18.189 پیش کیا گیا ہے جبکہ وائس کال کا نیا ورژن v2.18.192 ہے۔ اس کا اصل ورژن بعد میں آئے گا اور ابھی ٹیسٹ کے لیے بی ٹا ورژن گوگل پلے اسٹور پر ریلیز کیا گیا ہے۔
گلوبل آئل اینڈ گیس ڈسکوریز ریویو 2017 کی رپورٹ کے مطابق سال 2017 کی تیسری سہ ماہی کے دوران پاکستان نے تیل و گیس کے 2 بڑے ذخائر دریافت کیے ہیں جبکہ سال کے آخری 3 ماہ کے دوران تیل و گیس کے 4 مزید نئے ذخائر دریافت کیے۔
مقبوضہ کشمیر میں قابض بھارتی فوج کی فائرنگ سے 4 افراد شہید اور متعدد زخمی ہوگئے۔ کشمیر میڈیا سروس کے مطابق مقبوضہ کشمیر کے ضلع اننت ناگ میں قابض بھارتی فوج نے محاصرہ کیا اور سرچ آپریشن کے دوران رہائشی علاقے میں فائرنگ

پاکستان
 
آر ایس ایس
ہمارے پارٹنر
ضرور پڑھیں
ریڈرز سروس
شعر و ادب
مقامی خبریں
آڈیو
شہر شہر کی خبریں