کوئٹہ ۔ صوبہ بلوچستان کے سرحدی علاقے چمن میں بم دھماکے سے جمعیت علمائے اسلام (ف) کے ڈپٹی سیکریٹری جنرل مولوی حنیف زخموں کی تاب نہ لاتے ہوئے ہسپتال میں چل بسے۔ اس ضمن میں اسسٹنٹ کمشنر چمن یاسر دشتی نے جے یو آئی رہنما کے جاں بحق ہونے کی تصدیق کی۔

علاوہ ازیں انہوں نے بتایا کہ بم دھماکے میں جے یو آئی رہنما اور 12 سالہ لڑکے سمیت 3 افراد جاں بحق اور 9 سے زائد افراد زخمی ہوگئے۔ ابتدائی اطلاعات میں یہ بات سامنے آئی کہ دھماکا چمن کے علاقے تاج روڈ پر ہوا جس کے باعث وہاں موجود گاڑی کو بھی آگ لگ گئی۔

واقعے سے متعلق پولیس حکام کا کہنا تھا کہ دھماکا موٹر سائیکل میں نصب آئی ای ڈی کے ذریعے کیا گیا، جسے سڑک کنارے ہی کھڑا کیا گیا تھا۔ ڈی پی او چمن شوکت مہمند کا کہنا تھا کہ دھماکے میں 2 افراد جاں بحق، جس میں ایک 12 سالہ لڑکا بھی شامل ہے جبکہ 9افراد زخمی ہوئے۔

اس دھماکے میں جمعیت علمائے اسلام (ف) کے مرکزی رہنما مولوی محمد حنیف بھی زخمی ہوئے جنہیں تشویشناک حالت میں سول ہسپتال چمن منتقل کردیا گیا۔

پولیس کا کہنا تھا کہ دھماکے میں مولوی حنیف کو ہی نشانہ بنایا گیا۔ میڈیا کے مطابق اب تک ہسپتال میں 9 زخمیوں کو منتقل کیا گیا جبکہ دھماکے کے بعد ہسپتال میں ایمرجنسی نافذ کردی گئی۔

واقعے کے بعد پولیس اور قانون نافذ کرنے والے اداروں کی نفری نے فوری طور پر حادثہ کی جگہ پر پہنچ کر علاقے کو گھیرے میں لے لیا جبکہ امدادی ٹیموں کی جانب سے زخمیوں کو سول ہسپتال منتقل کرنے کا سلسلہ بھی شروع کردیا گیا۔

میڈیا کے مطابق دھماکے کی وجہ سے قریبی عمارتوں کے شیشے ٹوٹ گئے اور کئی املاک کو نقصان پہنچا۔

رواں ماہ کے آغاز میں بھی بلوچستان کے دارالحکومت کوئٹہ کے علاقے خزائی چوک میں یکے بعد دیگرے 2 دھماکوں میں ایک شخص جاں بحق جبکہ 10 افراد زخمی ہوگئے تھے۔

خیال رہے کہ بلوچستان میں موجود علیحدگی پسندوں نے پاک چین اقتصادی راہدای (سی پیک) جیسے خطے کے عظیم ترین منصوبے کو سبوتاژ کرنے اور صوبے میں بدامنی پھیلانے کے لیے متعدد مرتبہ عام شہریوں اور غیر ملکیوں کو ہدف بنایا جس میں متعدد افراد اپنی جان کی بازی ہار گئے ہیں۔

۔۔۔۔۔۔۔۔۔۔۔۔۔۔۔۔۔۔۔۔۔
نوٹ: مبصر ڈاٹ کام ۔۔۔ کا کسی بھی خبر سے متفق ہونا ضروری نہیں ۔۔۔ اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی فیس بک وال پر شیئر کریں۔ علاوہ ازیں آپ بھی اپنا کالم، بلاگ، مضمون یا کوئی خبر info@mubassir.com پر ای میل کر سکتے ہیں۔ ادارہ