صفدر دانش

صفدر دانش کا صحافتی سفر صوبہ خیبر پختونخوا کے ضلع ہنگو سے شائع ہونے والے ماہنامہ عبرت کے ساتھ 1996ء میں شروع ہوا، جو آج بھی تسلسل کے ساتھ جاری ہے۔ پاکستان کے شورش زدہ قبائلی خطے ہنگو اور اُس وقت کی اورکزئی ایجنسی میں انہوں نے مختلف معروف اور معتبر قومی و علاقائی میڈیا اداروں کے ساتھ نمائندہ خصوصی کی حیثیت سے صحافتی خدمات انجام دیں۔ ان اداروں میں معروف خبررساں ایجنسی این این آئی (NNI)، روزنامہ میدان پشاور اور روزنامہ مشرق پشاور قابلِ ذکر ہیں۔

صفدر دانش گزشتہ 22 برس سے وفاقی دارالحکومت اسلام آباد میں شعبۂ صحافت سے وابستہ ہیں، جہاں انہوں نے روزنامہ ہمدرد اسلام آباد، روزنامہ تاثیر کوہاٹ/اسلام آباد اور روزنامہ پبلک آئی اسلام آباد سمیت مختلف اخبارات میں صحافتی ذمہ داریاں انجام دیں۔

روایتی پرنٹ میڈیا کے ساتھ ساتھ صفدر دانش نے علمی و تحقیقی صحافت میں بھی اپنی خدمات انجام دیں۔ پاکستان کے معروف علمی و تحقیقی ادارے البصیرہ کے جریدے ماہنامہ پیام اسلام آباد کے ساتھ وہ طویل عرصے تک منیجنگ ایڈیٹر کے منصب پر فائز رہے۔

صفدر دانش گزشتہ 16 برس سے وفاقی دارالحکومت اسلام آباد سے شائع ہونے والے قومی اخبار روزنامہ مسلمان کے ساتھ ڈپٹی ایڈیٹر کی حیثیت سے وابستہ ہیں۔ روزنامہ مسلمان اسلام آباد کے علاوہ لاہور اور کراچی سے بھی بیک وقت شائع ہوتا ہے۔

پرنٹ میڈیا کے ساتھ ساتھ صفدر دانش نے ڈیجیٹل جرنلزم میں بھی اپنی شناخت بنائی۔ وہ مختلف نیوز پورٹلز کے ساتھ صحافتی خدمات انجام دے چکے ہیں اور گزشتہ 12 برس سے معروف نیوز ویب سائٹ مبصر ڈاٹ کام کے ایڈیٹر کی ذمہ داریاں نبھا رہے ہیں۔ اس کے علاوہ وہ سوشل میڈیا کے پلیٹ فارمز پر بھی صحافتی اور سماجی حوالے سے فعال کردار ادا کر رہے ہیں۔

صفدر دانش کو ملک بھر، بالخصوص راولپنڈی اور اسلام آباد کے صحافتی حلقوں میں ایک فعال اور متحرک صحافی کی حیثیت سے جانا جاتا ہے۔ وہ نیشنل پریس کلب اسلام آباد کے کونسل ممبر ہیں، جبکہ راولپنڈی/اسلام آباد یونین آف جرنلسٹس اور پاکستان فیڈرل یونین آف جرنلسٹس (PFUJ) کے بھی فعال رکن ہیں۔

اپنے طویل صحافتی سفر کے دوران صفدر دانش نے سیاسی، سماجی، مذہبی اور صحافتی حلقوں میں ایک وسیع تعلقات اور روابط کا نیٹ ورک قائم کیا ہے، جو ان کے پیشہ ورانہ تجربے اور طویل صحافتی وابستگی کی عکاسی کرتا ہے۔