راولپنڈی - پاک افغان سرحدی علاقے میں سیکیورٹی فورسز نے ایک بڑی اور کامیاب کارروائی کرتے ہوئے فتنہ الخوارج کے 8 بھارتی اسپانسرڈ دہشت گردوں کو جہنم واصل کر دیا ہے۔ آئی ایس پی آر کے مطابق، دہشت گردوں نے سرحد پار سے پاکستان میں داخل ہونے کی مذموم کوشش کی جسے پاک فوج کے جوانوں نے بروقت کارروائی کرتے ہوئے ناکام بنا دیا۔

پاک فوج کے شعبہ تعلقات عامہ (آئی ایس پی آر) کی جانب سے جاری بیان میں بتایا گیا ہے کہ ہلاک ہونے والے خارجی دہشت گردوں کے قبضے سے بھاری مقدار میں جدید اسلحہ اور گولہ بارود بھی برآمد ہوا ہے۔ اس وقت علاقے میں کلیئرنس آپریشن جاری ہے تاکہ کسی بھی ممکنہ چھپے ہوئے خطرے کو جڑ سے اکھاڑ پھینکا جا سکے۔ آئی ایس پی آر نے افغان طالبان کی جانب سے سرحدی نگرانی میں مسلسل ناکامی پر شدید تشویش کا اظہار کرتے ہوئے مطالبہ کیا ہے کہ افغان عبوری حکومت اپنی سرزمین کو پاکستان کے خلاف دہشت گردی کے لیے استعمال ہونے سے روکنے کے وعدے کو عملی جامہ پہنائے۔

بیان میں مزید کہا گیا کہ ملک میں دہشت گردی کے مکمل خاتمے کے لیے 'آپریشن عزمِ استحکام' کے تحت کارروائیاں پوری شدت سے جاری ہیں۔ واضح رہے کہ اس سے قبل باڑہ خیبر میں سیکیورٹی فورسز نے 10 اور بنوں میں انٹیلی جنس بیسڈ آپریشن کے دوران 3 خوارج کو نشانہ بنایا تھا، جس سے دہشت گردوں کے متعدد ٹھکانے تباہ ہو چکے ہیں۔

صدرِ مملکت آصف علی زرداری، وزیراعظم محمد شہباز شریف اور وفاقی وزیر داخلہ محسن نقوی نے اس کامیاب آپریشن پر سیکیورٹی فورسز کو زبردست خراجِ تحسین پیش کیا ہے۔ صدر زرداری نے کہا کہ وطن کے دفاع اور سرحدوں کے تحفظ کے لیے افواجِ پاکستان کا کردار قابلِ فخر ہے، جبکہ وزیراعظم شہباز شریف نے عزم دہرایا کہ جب تک دہشت گردی کا عفریت مکمل طور پر ختم نہیں ہو جاتا، یہ جنگ جاری رہے گی۔

وفاقی وزیر داخلہ محسن نقوی نے پاک فوج کی پیشہ ورانہ صلاحیتوں کو سراہتے ہوئے کہا کہ بھارتی سرپرستی میں کام کرنے والے دہشت گردوں کے مذموم عزائم خاک میں ملا دیے گئے ہیں۔ انہوں نے واضح کیا کہ پوری قوم اپنی بہادر افواج کے شانہ بشانہ کھڑی ہے اور وطنِ عزیز کی سلامتی پر کوئی آنچ نہیں آنے دی جائے گی۔

۔۔۔۔۔۔۔۔۔۔۔۔۔۔۔
نوٹ: مبصر ڈاٹ کام ۔۔۔ کا کسی بھی خبر سے متفق ہونا ضروری نہیں ۔۔۔ اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی فیس بک وال پر شیئر کریں۔ علاوہ ازیں آپ بھی اپنا کالم، بلاگ، مضمون یا کوئی خبر info@mubassir.com پر ای میل کر سکتے ہیں۔ ادارہ