دنیا بھر میں ہر سال 4 مئی کو انٹرنیشنل فائر فائٹرز ڈے منایا جاتا ہے، جو ان بہادر مرد و خواتین کو خراجِ تحسین پیش کرنے کا دن ہے جو ہر روز اپنی جانیں خطرے میں ڈال کر دوسروں کی جان و مال کو محفوظ بناتے ہیں۔ جب کہیں آگ بھڑکتی ہے، زلزلہ آتا ہے، عمارت گر جاتی ہے، یا کوئی ہنگامی صورتحال پیدا ہوتی ہے، تو یہی فائرفائٹرز اور ریسکیورز سب سے پہلے وہاں پہنچتے ہیں۔ ان کا مشن صرف آگ بجھانا نہیں بلکہ انسانیت کی خدمت کرنا، جان بچانا اور خطرے کی پرواہ کیے بغیر اپنی ذمہ داری نبھانا ہے۔ یہی وجہ ہے کہ دنیا انہیں خاموش ہیروز کا درجہ دیتی ہے۔

اس دن کو منانے کا مقصد ان کی خدمات کا اعتراف، ان کی قربانیوں کو یاد رکھنا، اور نئی نسل کو ان کے مشن سے آگاہ کرنا ہے۔ یہ دن ایک موقع ہوتا ہے کہ ہم اُن چہروں کو یاد کریں جو اپنی جانیں قربان کر چکے ہیں تاکہ دوسروں کی زندگیاں بچائی جا سکیں۔ پاکستان میں بھی گزشتہ بیس برسوں سے فائر سروسز، فائر اینڈ ریسکیو ایسوسی ایشن کی زیرِ سرپرستی، اس دن کو عقیدت، احترام اور جذبے کے ساتھ مناتی آئی ہیں۔ ہر سال شہداء کی قبروں پر پھول چڑھائے جاتے ہیں، ان کی تصاویر آویزاں کی جاتی ہیں، اور ان کے اہلِ خانہ سے اظہارِ یکجہتی کیا جاتا ہے۔

اس سال فائر اینڈ ریسکیو ایسوسی ایشن نے عزم کیا ہے کہ انٹرنیشنل فائر فائٹرز ڈے کو پورے قومی جذبے کے ساتھ منایا جائے گا، تاکہ نہ صرف ان ہیروز کو خراج تحسین پیش کیا جا سکے، بلکہ عوام میں فائر سیفٹی، ایمرجنسی رسپانس، اور احتیاطی تدابیر کے حوالے سے شعور بھی بیدار کیا جائے۔ خوش آئند بات یہ ہے کہ اب پاکستان کے تمام صوبوں، بشمول آزاد کشمیر اور گلگت بلتستان، میں ریسکیو 1122 کی سروس فعال ہے۔ یہ ادارہ نہ صرف فائرفائٹنگ بلکہ ایمبولینس، سرچ اینڈ ریسکیو، واٹر ریسکیو اور دیگر ایمرجنسی سروسز میں قابلِ قدر خدمات انجام دے رہا ہے۔ ان کے اہلکار دن رات بغیر کسی تعطیل کے ہمہ وقت تیار رہتے ہیں۔

کراچی، لاہور، پشاور، کوئٹہ، مظفرآباد اور گلگت میں بڑے پیمانے پر تقریبات منعقد کرنے کی تجویز دی گئی ہے، جن میں فائر فائیٹنگ مشقیں، آگاہی واک، سیمینارز، ٹریننگ سیشنز، اور شہداء کی یاد میں تقاریب شامل ہوں گی۔ ان تقریبات میں اسکولوں اور کالجوں کے طلبہ، اساتذہ، سول سوسائٹی، میڈیا اور سرکاری اداروں کو مدعو کیا جائے گا تاکہ یہ دن صرف ایک رسمی تقریب نہ رہے، بلکہ ایک متحرک اور سبق آموز مہم بن جائے۔
ریسکیو 1122 کی جانب سے عوام کو فائر سیفٹی کے اصول سکھانے، آگ لگنے کی صورت میں ابتدائی اقدامات، فائر ایکزٹ پلان، اور فرسٹ ایڈ جیسے موضوعات پر عملی تربیت دی جائے گی۔ شہریوں کو یہ سکھایا جائے گا کہ کسی بھی حادثے کی صورت میں خوفزدہ ہونے کے بجائے کس طرح ذمہ داری سے عمل کیا جائے اور جان و مال کو محفوظ رکھا جائے۔ خاص طور پر بچوں، خواتین اور بزرگوں کے تحفظ کے حوالے سے رہنمائی فراہم کی جائے گی۔

یہ دن ہمیں یہ سوچنے پر مجبور کرتا ہے کہ اگر کبھی ہمارے اردگرد کوئی ہنگامی صورتحال پیش آئے تو ہم کتنے تیار ہیں؟ کیا ہمارے اسکولوں، دفاتر اور گھروں میں فائر ایکزٹ پلان موجود ہے؟ کیا ہمارے پاس آگ بجھانے کے آلات ہیں؟ کیا ہمیں فرسٹ ایڈ کی بنیادی تربیت حاصل ہے؟ یہ تمام سوالات انٹرنیشنل فائر فائٹرز ڈے کے اہم پہلو ہیں، جو ہمیں نہ صرف فائر فائٹرز کی قربانیوں کی قدر سکھاتے ہیں، بلکہ خود کو محفوظ رکھنے کا شعور بھی دیتے ہیں۔
فائرفائٹرز وہ لوگ ہیں جو خطرے کے سامنے ڈٹ کر کھڑے ہوتے ہیں، جب پوری دنیا پیچھے ہٹ رہی ہوتی ہے۔ ان کے جذبے کی کوئی قیمت نہیں، ان کی ہمت کا کوئی نعم البدل نہیں، اور ان کی خدمت کا کوئی متبادل نہیں۔ انٹرنیشنل فائر فائٹرز ڈے ہمیں یہ سکھاتا ہے کہ یہ ہیروز صرف یونیفارم میں نہیں ہوتے، بلکہ وہ ہر اس انسان کی شکل میں ہمارے درمیان موجود ہیں جو دوسروں کے لیے خود کو قربان کرنے کو تیار ہو۔

آئیے، اس 4 مئی کو ہم اپنے ان ہیروز کو سچا سلام پیش کریں، ان کی کہانیوں کو سنائیں، ان کی قربانیوں کو یاد رکھیں، اور اس عزم کے ساتھ آگے بڑھیں کہ ہم ایک محفوظ، باشعور اور ذمہ دار معاشرہ بنانے میں ان کے شانہ بشانہ کھڑے ہیں۔

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
نوٹ: مبصر ڈاٹ کام ۔۔۔ کا کالم نگار، بلاگر یا مضمون نگار کی رائے سے متفق ہونا ضروری نہیں ۔۔۔ اگر آپ بھی ہمارے لیے کالم / مضمون یا اردو بلاگ لکھنا چاہتے ہیں تو قلم اٹھائیے اور 500 الفاظ پر مشتمل تحریر اپنی تصویر، مکمل نام، فون نمبر اور مختصر تعارف کے ساتھ info@mubassir.com پر ای میل کریں۔ ادارہ