کور کمانڈر کانفرنس راولپنڈی

راولپنڈی - فیلڈ مارشل سید عاصم منیر کی زیرِ صدارت جی ایچ کیو میں اہم کور کمانڈرز کانفرنس منعقد ہوئی، جس میں ملکی سلامتی، علاقائی صورتحال اور دہشت گردی کے خلاف جاری آپریشنز کا تفصیلی جائزہ لیا گیا۔

اجلاس کے شرکا نے سعودی عرب کے پیٹرو کیمیکل اور صنعتی کمپلیکس پر حالیہ ایرانی حملوں کی شدید مذمت کرتے ہوئے انہیں غیر ضروری قرار دیا اور کہا کہ ایسی بلاجواز جارحیت مشرقِ وسطیٰ میں امن کی مخلصانہ کوششوں کو نقصان پہنچا رہی ہے۔ فورم نے واضح کیا کہ اشتعال انگیزی کے باوجود سعودی عرب کا تحمل سفارتی حل کی راہ ہموار کر رہا ہے۔

آرمی چیف فیلڈ مارشل سید عاصم منیر نے کانفرنس سے خطاب کرتے ہوئے مسلح افواج کی پیشہ ورانہ مہارت اور انسدادِ دہشت گردی کی کارروائیوں میں ثابت قدمی کو سراہا۔ انہوں نے ہدایت کی کہ 'آپریشن غضب لِلحق' کی رفتار کو اس وقت تک برقرار رکھا جائے جب تک آخری دہشت گرد کا خاتمہ نہیں ہو جاتا۔

ضرور پڑھیں: شاید کل: ایران کو ایک رات میں تباہ کر دیں گے، ڈونلڈ ٹرمپ

انہوں نے مزید کہا کہ بھارت اور دیگر بیرونی قوتوں کی ایما پر کام کرنے والے تمام دہشت گرد پراکسی عناصر، ان کے سہولت کاروں اور پناہ گاہوں کا مکمل خاتمہ کیا جائے گا اور پاکستان کی خودمختاری پر کوئی سمجھوتہ نہیں ہوگا۔

اجلاس میں مقبوضہ کشمیر میں انسانی حقوق کی سنگین خلاف ورزیوں اور بھارت کے 'فالس فلیگ آپریشنز' کے جھوٹے بیانیے کو بھی مسترد کیا گیا۔ شرکا نے کہا کہ بھارت کی جانب سے پھیلائی جانے والی گمراہ کن معلومات عالمی سطح پر بے نقاب ہو چکی ہیں۔

آرمی چیف نے زور دیا کہ حکومت، عوام اور فوج کے مشترکہ تعاون سے نہ صرف سکیورٹی بلکہ ملکی معاشی استحکام بھی بہتر ہو رہا ہے، اور پاکستان علاقائی و عالمی سطح پر ایک ذمہ دار اسٹیک ہولڈر کے طور پر اپنا فعال کردار ادا کرتا رہے گا۔

۔۔۔۔۔۔۔۔۔۔۔۔۔۔۔
نوٹ: مبصر ڈاٹ کام ۔۔۔ کا کسی بھی خبر سے متفق ہونا ضروری نہیں ۔۔۔ اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی فیس بک وال پر شیئر کریں۔ علاوہ ازیں آپ بھی اپنا کالم، بلاگ، مضمون یا کوئی خبر info@mubassir.com پر ای میل کر سکتے ہیں۔ ادارہ