ایرانی صدر مسعود پزشکیان کی فائل فوٹو

تہران - ایرانی صدر مسعود پزشکیان نے اسرائیل کو سخت وارننگ دیتے ہوئے کہا ہے کہ ایران کی افواج ہر لمحہ الرٹ ہیں اور ان کی "انگلیاں اب بھی ٹریگر پر" موجود ہیں۔ انہوں نے واضح کیا کہ لبنان پر جاری وحشیانہ اسرائیلی حملے حالیہ جنگ بندی کے معاہدے اور پاکستان کی میزبانی میں ہونے والے متوقع مذاکرات کو بے معنی بنا سکتے ہیں۔

غیر ملکی میڈیا کے مطابق صدر پزشکیان نے خبردار کیا کہ اگر لبنان میں اسرائیلی جارحیت فوری طور پر بند نہ ہوئی تو امن کا پورا عمل اپنی اہمیت کھو دے گا۔ انہوں نے اعادہ کیا کہ ایران لبنانی عوام کو کسی صورت تنہا نہیں چھوڑے گا اور ان کی ہر ممکن حمایت جاری رکھی جائے گی۔

ضرور پڑھیں: اسرائیلی خلاف ورزیاں: ایران نے آبنائے ہرمز پھر بند کردی

ایرانی صدر کا یہ بیان ایک ایسے وقت میں سامنے آیا ہے جب خطے میں عارضی سیز فائر کے نفاذ کے باوجود اسرائیل نے لبنان میں حملوں کا سلسلہ تیز کر دیا ہے۔

دوسری جانب ایرانی پارلیمنٹ کے اسپیکر محمد باقر قالیباف نے بھی اسرائیل کو کڑی تنقید کا نشانہ بناتے ہوئے کہا ہے کہ جنگ بندی کی تجاویز میں لبنان اور تمام مزاحمتی محور شامل ہیں۔

انہوں نے انکشاف کیا کہ مذاکرات کے آغاز سے پہلے ہی اسرائیل نے 10 نکاتی تجاویز کے 3 اہم نکات کی خلاف ورزی کر دی ہے، جن میں ایران کی فضائی حدود میں ڈرون کی دراندازی اور یورینیئم افزودگی کے حق کی نفی شامل ہے۔ قالیباف نے خبردار کیا کہ ان خلاف ورزیوں کی بھاری قیمت چکانی پڑے گی اور موجودہ حالات میں مذاکرات کا عمل غیر معقول ہوتا جا رہا ہے۔

۔۔۔۔۔۔۔۔۔۔۔۔۔۔۔
نوٹ: مبصر ڈاٹ کام ۔۔۔ کا کسی بھی خبر سے متفق ہونا ضروری نہیں ۔۔۔ اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی فیس بک وال پر شیئر کریں۔ علاوہ ازیں آپ بھی اپنا کالم، بلاگ، مضمون یا کوئی خبر info@mubassir.com پر ای میل کر سکتے ہیں۔ ادارہ