تہران - ایران کی ملٹری سینٹرل آپریشنل کمانڈ "خاتم الانبیاء" نے دعویٰ کیا ہے کہ دبئی میں امریکی فوج کے لیے کام کرنے والے یوکرین کے اینٹی ڈرون سسٹم کے ایک ڈپو کو نشانہ بنا کر تباہ کر دیا گیا ہے۔

سرکاری ٹی وی پر جاری بیان کے مطابق مذکورہ ڈپو امریکی کمانڈروں اور فوجی اہلکاروں کو تکنیکی معاونت فراہم کر رہا تھا، جسے کامیاب کارروائی میں مکمل طور پر تباہ کر دیا گیا۔

میڈیا رپورٹس کے مطابق اس سے قبل ہفتے کے روز یوکرین کے صدر ولادیمیر زیلنسکی نے متحدہ عرب امارات کا غیر اعلانیہ دورہ کیا، جس کے دوران دونوں ممالک کے درمیان دفاعی تعاون بڑھانے پر اتفاق کیا گیا۔

ذرائع کا کہنا ہے کہ زیلنسکی کے حالیہ دورۂ مشرق وسطیٰ کے دوران یوکرین اور سعودی عرب کے درمیان فضائی دفاع سے متعلق ایک معاہدہ بھی طے پایا۔ مزید برآں، رواں ماہ کے آغاز میں یوکرینی صدر نے بتایا تھا کہ 200 سے زائد یوکرینی انسدادِ ڈرون ماہرین متحدہ عرب امارات، قطر، سعودی عرب اور کویت میں خدمات انجام دینے کے لیے تعینات کیے جا رہے ہیں۔

یہ پیش رفت ایسے وقت میں سامنے آئی ہے جب ایران، 28 فروری کو شروع ہونے والی کشیدگی کے بعد، خلیج میں اسرائیل اور امریکی مفادات کو نشانہ بنانے کے دعوے کر رہا ہے۔

ایران خلیجی ممالک پر الزام عائد کرتا رہا ہے کہ وہ اپنی سرزمین امریکی افواج کو فراہم کر رہے ہیں، تاہم متعلقہ ریاستیں ان الزامات کی مسلسل تردید کرتی آئی ہیں۔ ان کا مؤقف ہے کہ وہ اپنی زمین یا فضائی حدود کسی بھی ملک کے خلاف استعمال نہیں ہونے دیں گی۔

۔۔۔۔۔۔۔۔۔۔۔۔۔۔۔
نوٹ: مبصر ڈاٹ کام ۔۔۔ کا کسی بھی خبر سے متفق ہونا ضروری نہیں ۔۔۔ اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی فیس بک وال پر شیئر کریں۔ علاوہ ازیں آپ بھی اپنا کالم، بلاگ، مضمون یا کوئی خبر info@mubassir.com پر ای میل کر سکتے ہیں۔ ادارہ