اسلام آباد  ۔ قائد ملت جعفریہ پاکستان علامہ سید ساجد علی نقوی کی اپیل پر جمعة الوداع کو یوم القدس کے طور پر منایا جائےگا ،مرکزی القدس کمیٹی نے یوم القدس کے سلسلے میں تیاریا ں مکمل کرلیں ، ملک بھر کی بڑی شاہراہوں اور شہروں سے لے کر قصبوں اور دیہاتوں تک اظہار یکجہتی کے پرچم، پینا فلیکس، بینرز، پوسٹرز آویزاں کردیئے گئے۔

شیعہ علما کونسل پاکستان کے مرکز سیکرٹری جنرل علامہ عارف حسین واحدی کہتے ہیں مظلوم فلسطینی عوام سے اظہار یکجہتی کےلئے بعد از نماز جمعہ پرامن احتجاجی مظاہرے کئے جائینگے، شرکاءاحتیاطی تدابیر کو مدنظر رکھیں، عالمی ضمیر جھنجھوڑنے کےلئے اقوام متحدہ، یورپی یونین، ایمنسٹی انٹرنیشنل ، ہیومن رائٹس کمیشن ، او آئی سی اور سفرا کو خطوط /احتجاجی مراسلے بھی ارسال کردیئے ۔

مبصر ڈاٹ کام کو تفصیلات بتاتے ہوئے علامہ عارف واحدی کا کہنا تھا کہ قائد ملت جعفریہ پاکستان علامہ سید ساجد علی نقوی کی اپیل پر آج پاکستا ن بھر میں جمعة الوداع کو مظلوم فلسطینی عوام سے اظہار یکجہتی اور قبلہ اول کی صیہونی تسلط سے آزادی کےلئے یوم القدس کے طور پر منایا جارہاہے، احتجاجی ریلیوں، سیمینارز اور مختلف تقاریب کے انعقاد کے سلسلے میں انتظامات مکمل کرلئے گئے ہیں جہاں ملک بھر کی بڑی شاہراہوں پر پینا فیلکس ، اظہار یکجہتی کے پرچم، بینرز، پوسٹرز آویزاں کئے گئے وہیں تمام قومی اخبارات میں آگاہی پیغامات بھی شائع کرائے گئے جبکہ عالمی ضمیر کو جھنجھوڑنے اور بیدار کرنے کےلئے اقوام متحدہ، یورپی یونین، ایمنسٹی انٹرنیشنل ، ہیومن رائٹس کمیشن ، او آئی سی اور سفرا کو خطوط /احتجاجی مراسلے بھی ارسال کئے گئے ہیں اور فلسطینیوں پر صیہونی اسرائیلی ریاست کے مظالم اور امہ کی تشویش و جذبات پہنچائے گئے ہیں۔

 سیکرٹری جنرل شیعہ علماءکونسل علامہ عارف حسین واحدی کہتے ہیں آج فلسطینی عوام سے بھرپور اظہار یکجہتی ، ظلم کے خلاف آواز بلند کرنے اور اسرائیل و اس کے حواریوں کےخلاف کلمہ حق کہنے کا یوم تجدید عہد ہے ، آج وفاقی دارالخلافہ سمیت تمام صوبائی دارالحکومتوں ، گلگت بلتستان تا کشمیر اور ملک کے کونے کونے سے عوام اپنے مظلوم بھائیوں کی حمایت میں نکلیں گے ۔

 انہوں نے کہاکہ جہاں دنیا سے ظلم و جبر کے خاتمے کےلئے جمعة الوداع کو اجتماعی دعاﺅں کا اہتمام کیا جائے وہیں مظلوم فلسطینی و کشمیری بھائیوں سے اظہار یکجہتی اور قبلہ اول کی صیہونی تسلط سے آزادی کےلئے احتجاجی ریلیوں میں بھی عوام بھرپور طریقے سے شرکت یقینی بنائیں البتہ کورونا وائرس کی موجودہ صورتحال میں تمام طبی احتیاطی تدابیر بھی اختیار کرتے ہوئے پرامن احتجاج ریکارڈ کرایا جائے۔

علامہ عارف حسین واحدی کا کہنا تھا کہ جب تک عالمی ضمیر بیدار نہیں ہوگا اور قبلہ اول کی آزای اور مظلوم فلسطینیوں کو ان کا حق نہیں دیا جائےگا ہمارا یہ احتجاج جاری رہے گا۔

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
نوٹ: مبصر ڈاٹ کام ۔۔۔ کا کالم نگار، بلاگر یا مضمون نگار کی رائے سے متفق ہونا ضروری نہیں ۔۔۔ اگر آپ بھی ہمارے لیے کالم / مضمون یا اردو بلاگ لکھنا چاہتے ہیں تو قلم اٹھائیے اور 500 الفاظ پر مشتمل تحریر اپنی تصویر، مکمل نام، فون نمبر اور مختصر تعارف کے ساتھ info@mubassir.com پر ای میل کریں۔ ادارہ