لائن آف کنٹرول پر بھارتی اشتعال انگیزی کے جواب میں پاک فوج نے دشمن کو ایک بار پھر سخت پیغام دیا ہے۔ میڈیا رپورٹس میں سیکورٹی ذرائع کے حوالے سے بتایا گیا ہے کہ بھارتی افواج نے ہجیرہ، فارورڈ کہوٹہ اور کھوئی رٹہ کے علاقوں میں نہتے شہریوں کو نشانہ بنایا، جس کے نتیجے میں 5 شہری شہید جبکہ 7 شدید زخمی ہوئے۔ اس جارحیت کا مقصد پاکستانی دفاعی لائن پر دباؤ ڈالنے کی ناکام کوشش تھی، جو بالآخر دشمن ہی کے خلاف ایک بڑی ناکامی میں تبدیل ہو گئی۔

میدانِ جنگ میں پاک فوج کی مؤثر اور بروقت جوابی کارروائی نے دشمن کی توپوں کو خاموش کر دیا۔ کئی بھارتی فوجی چوکیاں مکمل طور پر تباہ کر دی گئی ہیں جن میں کیلر سیکٹر کی ڈوبہ مور پوسٹ، بٹالین ہیڈکوارٹر سوجی اور پیر کانتھی سیکٹر کی جبار و ترکھیاں چوکیاں شامل ہیں۔ ان پوسٹوں کی تباہی سے بھارتی فوج کو نہ صرف جانی بلکہ عسکری سامان کا بھی بڑا نقصان اٹھانا پڑا۔

پاک فوج کی حکمت عملی یہ ثابت کرتی ہے کہ پاکستان نہ صرف دفاع میں مضبوط ہے بلکہ جارحیت کا جواب دینا بھی بخوبی جانتا ہے۔ دشمن کی چالاکیوں اور بزدلانہ حربوں کے باوجود پاکستانی افواج نے اپنی کارروائیاں صرف اُن بھارتی فوجی پوزیشنز تک محدود رکھیں جہاں سے شہری آبادی کو نشانہ بنایا جا رہا تھا۔ ان حملوں کا نشانہ صرف دشمن کے عسکری اثاثے بنے اور یہ ظاہر کرتا ہے کہ پاکستان کی جوابی کارروائی نہ صرف مؤثر بلکہ ذمہ دارانہ بھی ہے۔


دریں اثنا دھرمسال 2 کے بالمقابل بٹل سیکٹر میں دشمن نے ہزیمت اٹھانے کے بعد سفید جھنڈا لہرا دیا جو کہ شکست تسلیم کرنے کا واضح اظہار ہے۔ عسکری ذرائع نے اس امر کی تصدیق کرتے ہوئے کہا کہ بھارت نے یہ جھنڈا امن کی علامت کے طور پر نہیں بلکہ دفاعی طور پر گھٹنے ٹیکنے کے طور پر لہرایا ہے۔ دشمن کی یہ بزدلی اس بات کی غماز ہے کہ پاک فوج کی جوابی کارروائی اتنی شدید اور غیر متوقع تھی کہ بھارتی فوجی مزید لڑائی جاری رکھنے کی پوزیشن میں ہی نہیں رہے۔

اسی دوران حاجی پیر سیکٹر میں دشمن کی رِنگ کنٹوئر پوسٹ اور پوکران مارٹر بگھسر چوکیاں بھی مکمل طور پر تباہ کر دی گئیں۔ کیلر سیکٹر میں دشمن کی مہیری پوسٹ اور خالصہ ٹاپ اور رکھ چکری سیکٹر میں دنا ٹاپ و ماؤنڈ پوسٹ بھی صفحہ ہستی سے مٹ چکی ہیں۔ ان کارروائیوں سے واضح ہوتا ہے کہ لائن آف کنٹرول پر دشمن کی بڑی تعداد میں دفاعی پوزیشنیں ختم ہو چکی ہیں، جس نے بھارتی فوج کے مورال کو شدید دھچکا پہنچایا ہے۔

اس کے علاوہ پاک فوج نے نانگا ٹک میں واقع بھارتی بٹالین ہیڈکوارٹر کو بھی بھاری گولہ باری سے نشانہ بنایا، جس سے نہ صرف عمارت کو شدید نقصان پہنچا بلکہ دشمن کو عسکری اعتبار سے بھی بھاری نقصان برداشت کرنا پڑا۔ حاجی پیر سیکٹر میں قائم جھنڈا زیارت پوسٹ بھی پاک فوج کی حکمتِ عملی کا نشانہ بنی اور تباہ ہو گئی۔

واضح رہے کہ یہ پہلی بار نہیں کہ بھارت نے بلا اشتعال فائرنگ کے ذریعے سول آبادی کو نشانہ بنایا ہو۔ ماضی میں بھی ایسے واقعات سامنے آ چکے ہیں جن میں معصوم شہری نشانہ بنتے رہے ہیں لیکن حالیہ جارحیت کے جواب میں پاکستان نے یہ واضح پیغام دے دیا ہے کہ اب ہر کارروائی کا جواب بھرپور اور دو ٹوک انداز میں دیا جائے گا۔

۔۔۔۔۔۔۔۔۔۔۔۔۔۔۔
نوٹ: مبصر ڈاٹ کام ۔۔۔ کا کسی بھی خبر سے متفق ہونا ضروری نہیں ۔۔۔ اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی فیس بک وال پر شیئر کریں۔ علاوہ ازیں آپ بھی اپنا کالم، بلاگ، مضمون یا کوئی خبر info@mubassir.com پر ای میل کر سکتے ہیں۔ ادارہ