چیف جسٹس پاکستان جسٹس گلزار احمد نے سیکرٹری دفاع کو حکم دیا ہے کہ تمام فوجی چھاؤنیوں میں جائیں اور بتائیں کہ ملٹری لینڈ صرف اسٹریٹجک مقاصد کے لیے ہے۔ سپریم کورٹ کراچی رجسٹری میں ملٹری لینڈ کو کمرشل مقاصد کے لیے استعمال کرنے سے متعلق کیس کی سماعت چیف جسٹس پاکستان جسٹس گلزار احمد کی سربراہی میں ہوئی۔

جیو نیوز کے مطابق عدالت نے سیکرٹری دفاع سے استفسار کیا کہ آپ کے پاس تحریری رپورٹ ہے؟ جس پر سیکرٹری دفاع نے کہا کہ تحریری رپورٹ جمع کرانے کے لیے مہلت دی جائے۔

چیف جسٹس نے ریمارکس دیے کہ یہ آپ زمین پر کیا چلا رہے ہیں، زمین اسٹرٹجیک اور دفاع کے لیے دی گئی تھی۔

جیو نیوز کے مطابق جسٹس گلزار احمد نے کہا کہ آپ نے ملٹری لینڈ پر کمرشل سرگرمیاں شروع کر دی ہیں، شادی ہال بنا دیے، سنیما بنا دیا، ہاؤسنگ سوسائٹیز بنا دیں، کیا یہ دفاع کے لیے ہے؟ سکریٹری دفاع نے کہا کہ ہم نے فیصلہ کر لیا ہے کہ آئندہ ایسا نہیں ہو گا۔

جسٹس قاضی امین نے سیکریٹری دفاع کی سرزنش کرتے ہوئے ریمارکس دیے کہ یہ آپ کیا کہہ رہے جو کیا ہے وہ سب ختم کرنا ہو گا۔

چیف جسٹس گلزار احمد نے ریمارکس دیے کہ آپ اسلام آباد بیٹھے ہوئے ہیں آپ کو کیا پتہ یہاں کیا کیا ہو رہا ہے، آپ تمام فوجی چھاؤنیوں میں جائیں اور بتائیں زمین صرف اسٹرٹیجک مقاصد کے لیے استعمال ہو گی۔

میڈیا کے مطابق ان کا کہنا تھا کہ مسرور بیس کیماڑی اور فیصل بیس سب کمرشل کیا ہوا ہے، سائن بورڈز ہٹانے کا کہا تو اس کے پیچھے بڑی بڑی بلڈنگز بنا دی گئیں۔ عدالت نے سیکرٹری دفاع سے تحریری جواب طلب کرتے ہوئے کیس کی مزید سماعت 30 نومبر تک ملتوی کر دی۔

۔۔۔۔۔۔۔۔۔۔۔۔۔۔۔۔۔۔۔

نوٹ: مبصر ڈاٹ کام ۔۔۔ کا کسی بھی خبر سے متفق ہونا ضروری نہیں ۔۔۔ اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی فیس بک وال پر شیئر کریں۔ علاوہ ازیں آپ بھی اپنا کالم، بلاگ، مضمون یا کوئی خبر info@mubassir.com پر ای میل کر سکتے ہیں۔ ادارہ